РЕАЛИЗИРАН ШЕСТИОТ КОНГРЕС НА МАКЕДОНСКИТЕ ГЕОГРАФИ

Македонското географско друштво, во соработка со Институтот за географија, од 29 до 30 јуни го организираше шестиот по ред Конгрес на македонските географи со меѓународно учество. Настанот се одржа во историскиот град Охрид, кој се нарекува и балкански Ерусалим поради неговото богато природно, културно и верско наследство. Овој живописен амбиент даде инспиративна основа за Конгресот, поттикнувајќи чувство на поврзаност помеѓу природно-географските и социо-економските теми што се дискутираа.

Конгресот беше поделен на следните тематски делови:

Физичка географија
Овој дел се фокусираше на природните пејзажи, климатските промени, еколошките процеси и нивните влијанија во просторот. Истражувачите презентираа трудови за различни теми од физичката географија, вклучувајќи геоморфологија, хидрологија и климатологија.

Социо-економска географија
Дискусиите во овој дел се фокусираа на интеракцијата човек – простор, урбаниот и руралниот развој, демографските промени и економската географија. Презентациите ја истакнаа социо-економската динамика и нејзиното влијание врз различни региони и поедини популации популациски текови.

Картографија, ГИС и просторно планирање
Во овој дел се презентираше напредокот во картографијата, географските информациски системи (ГИС) и просторното планирање. Учесниците споделија иновативни техники за картирање, алатки за просторна анализа и нивните апликации во урбаното и регионалното планирање.

Настава во географијата
Учесниците ги споделуваа искуствата за современите методи и предизвици во наставата по географија на различни образовни нивоа. Фокусот беше на подобрување на застапеноста на географијата во настаните планови на сите нивоа, развојот на наставните програми и интегрирањето на новите технологии во образовниот систем.

Учесниците ги презентираа своите научни истражувања преку усни и постер презентации, придонесувајќи за активна и динамична академска атмосфера. Овие презентации обезбедија предуслови за истражувачите да ги споделат своите достигнувања и да се вклучат во плодни дискусии.

На конгресот присуствуваа над педесет учесници од повеќе земји, меѓу кои: Полска, Хрватска, Босна и Херцеговина, Србија, Косово, Албанија и Македонија. Нивното присуство го истакна меѓународното значење на настанот и ја поттикна меѓудржавната академска соработка. Разновидното учество, исто така, ги збогати дискусиите, носејќи повеќе перспективи и истакнувајќи ја природата на глобалните географските предизвици и можности.

Конгресот свечено го отвори претседателот на Македонското географско друштво, доц. д-р Христина Димеска Трајкова, која срдечно ги поздрави присутните и изрази благодарност за нивното присуство. Нејзиното воведно обраќање ја истакна важноста на географските истражувања и нивното влијание врз регионалните и глобалните текови. Д-р Димеска Трајкова ја истакна улогата на географите во справувањето со предизвиците како што се: зајакнувањето на позицијата на географијата во образовниот систем, климатските промени, одржливиот развој и урбанизацијата. На крајот од својот говор, претседателот на Македонското географско друштво ја искажа својата благодарност кон деканот на Природно-математичкиот факултет во Скопје, проф. д-р Даворин Трпески за укажаната поддршка во процесот на реализација на Конгрес и за особениот придонес во унапредувањето на географската наука.

По излагањето на д-р Димеска Трајкова, на собирот се обрати проф. д-р Благоја Маркоски, раководител на Институтот за географија, кој ја истакна посветеноста на Институтот за унапредување на географската наука и на нејзината клучна улога во образованиот процес. Тој ја истакна важноста од поттикнување на средина за соработка каде што истражувачите можат да споделуваат знаења и идеи.

Учесниците дополнително ги поздравија истакнати гости, меѓу кои:

Павел Свијањевич од Универзитетот во Вроцлав, Полска, кој сподели сознанија за можностите за заедничко истражување и важноста на меѓународната соработка во полето на географијата. 

Даница Шантиќ од Географскиот факултет во Белград, Србија, ја поздрави организацијата на Конгресот и ги сподели искуствата и предизвиците со кои тие се соочуваат во географската наука и процесот на едукација во нивната држава.

Сања Клемпиќ Богади од Институтот за миграции и етнички студии во Загреб, Хрватска, која презентираше за значењето на миграциските студии во современата географија, нагласувајќи го влијанието на миграцијата врз социо-економските и културните процеси.

По овие поздравни говори, започна научниот дел од Конгресот. Учесниците се вклучија во своите сесии со научни достигнувања користејќи нови методи во своите потесни научни полиња. Овие сесии не само што ги истакнаа најсовремените истражувања, поттикнаа значајни дискусии и креираа перспективи за потенцијална соработка меѓу географите од различни држави.

Настанот заврши со резиме на клучните дискусии и резултати, отворајќи го патот за идни истражувања и партнерства. Во завршниот дел учесниците дискутираа за идните насоки на географските истражувања и важноста на интердисциплинарните пристапи.

Шестиот конгрес на македонските географи не само што ја покажа различноста и длабочината на географските истражувања туку и ги зајакна врските во меѓународната географска заедница. Настанот креираше нови можности за идна соработка и иновации, инспирирајќи ги учесниците да продолжат со актуелни истражувачки теми.

Фотогалерија од Конгресот

Подготвиле:
доц. д-р Христина Димеска Трајкова
доц. д-р Владимир Златаноски