Предавање на проф. д-р Благоја Маркоски на курсот „ГИС и далечинска детекција за управување со водни ресурси“
30.12.2025
На ден 26 декември 2025 година, во просториите на Градежниот факултет при Универзитетот „Св. Кирил и Методиј“ во Скопје, проф. д-р Благоја Маркоски, редовен професор од Институтот за географија одржа стручно предавање на тема „Вовед во картографија и картографски методи“. Предавањето беше реализирано во рамки на сертифицираниот курс за доживотно учење „ГИС и далечинска детекција за управување со водни ресурси“, кој е конципиран како поддршка на континуираниот личен и професионален развој на стручни кадри и професионалци од министерства, општини, јавни претпријатија, приватни инженерски компании, невладини организации и истражувачки институции; како и студенти од техничките и еколошките науки.
Во текот на предавањето, професорот ги презентираше основните концепти и принципи на картографијата, со посебен акцент на картографските методи за прикажување, анализа и интерпретација на просторни податоци, како и нивната примена во рамки на географските информациски системи (ГИС). Дополнително, беа разгледани и современи пристапи и техники за визуелизација на просторни информации, релевантни за ефикасно управување со водните ресурси.
Посебна вредност на предавањето беше интерактивниот пристап, при што слушателите активно учествуваа во процесот на учење. Преку практични примери и водени задачи, учесниците имаа можност самостојно да се ориентираат и снајдат на карта, да препознаваат просторни елементи, да анализираат симболи, размери и координатни системи, како и да ги поврзат картографските прикажувања со реални просторни појави. Овој начин на работа овозможи подлабоко разбирање на материјата и поттикна дискусија и размена на искуства меѓу предавачот и слушателите.
Овие предавања имаат исклучително значење за учесниците, бидејќи придонесуваат кон продлабочување на теоретските знаења и нивна директна примена во практични ситуации, особено во контекст на просторното планирање и управувањето со водните ресурси. Развивањето на картографска писменост и способноста за правилно читање и интерпретација на карти претставува клучна компетенција за стручњаците кои работат со просторни и геопросторни податоци.
Изработил: Асс. м-р Емилија Маневска
