ОДРЖАНА ВТОРА ПРАКТИЧНА РАБОТИЛНИЦА СО TOMTOM MAPS И OPEN STREET MAP СО СТУДЕНТИТЕ ОД ИНСТУТУТОТ ЗА ГЕОГРАФИЈА
Во компјутерската лабораторија на Институтот за географија беше успешно реализирана втора практична работилница под наслов „Мапирај го светот – работилница за Open Street Map“ за студентите од географија. На одржаната работилница, студентите имаа можност да се запознаат со основите и примената на Open Street Map (OSM), како и да стекнат практично искуство во внесување и обработка на просторни податоци.
Работилницата беше официјално отворена од проф. д-р Свемир Горин, редовен професор на Институтот за географија. Во својот воведен говор, ја истакна важноста на слободно достапните просторни податоци и нивната примена во современата географија. Исто така, потенцирано беше дека дигиталното картирање претставува клучна алатка за научни истражувања, урбанистичко планирање и управување со просторот.
Првиот предавач, Бесфорт Гури, главен извршен директор на Мрежата за просторни податоци, ги запозна студентите со основите на Open Street Map и неговата улога како глобална платформа за мапирање, каде беа споделени примери за успешни проекти кои го користат OSM и ја нагласи важноста на отворените геопросторни податоци во современиот свет.
Вториот предавалч, г-дин Миле Милковски, соработник за развој на партнерствата на ТомТом во Балканот и Југоисточна Европа, ја објасни интеграцијата на Open Street Map со комерцијалните геопросторни решенија. Тој даде увид во процесот на обработка на податоците и начините на кои компаниите како ТомТом соработуваат со OSM за да креираат точни и ажурирани мапи. Студентите се запознаа како се користат податоците од OSM за развој на навигациски системи и други геопросторни апликации.
Третиот предавач, Салим А. Бајдун, претставник на ТомТом, објасни за меѓународната соработка на Open Street Map заедницата со бројни приватни фирми и државни институции, за успешно завршени интернационални проекти и за тековни проекти.
Практичниот дел од работилницата започна со демонстрација на внесување и уредување на податоци во Open Street Map и преку MapRoulette. Преку конкретни примери, студентите беа водени низ процесот на додавање нови објекти, корекција на постоечки податоци и означување на географски карактеристики во платформата. Во практичната работа, студентите користеа различни алатки за внесување и проверка на податоците, како и да ги анализираат придобивките од отвореното мапирање во различни апликации.
На крајот од работилницата, сите учесници потврдија за важноста на одвивање на работилници, каде покрај теоретските знаења, се применуваат и практични вештини и учења.
Во следниот период, ќе следи доделување на сертификати за учество, како потврда за нивната успешна работа и вложен труд. Овој сертификат ќе им послужи како значајна референца при нивниот понатамошен професионален и академски развој во областа на географијата и просторните податоци
Работилницата „Мапирај го светот – работилница за Open Street Map“ претставуваше одлична можност за студентите од Институтот за географија да се стекнат со практично искуство и да ги прошират своите знаења во областа на дигиталното мапирање. Овој настан ја потврди важноста на ваквите иницијативи во образовниот процес, овозможувајќи им на студентите директен контакт со експерти од индустријата и современите технологии во геопросторното картирање.
Подготвил:
Асист. м-р Арсе Кузманоски
